For di e monumentonan historico y museonan importante, te cu practica di patrimonio bibo y forma di arte contemporaneo, cultura ta enrikece nos bida na tur manera y ta yuda construi comunidadnan inclusivo, innovativo y resiliente. Protegiendo y salvaguardiando patrimonio cultural y natural di mundo, apoyando creatividad y e sectornan cultural dinamico, ta fundamental pa confronta e retonan di nos tempo;for di cambio climatologico te cu pobresa, desigualdad, e division digital y e emergencia- y conflictonan cada bes mas complica.
UNESCO ta convenci cu ningun desaroyo por ta sostenibel, sin un componente cultural fuerte. En realidad, ta solamente un desaroyo for di e punto di bista cu e ser humano ta central, basa riba respet mutuo, cu dialogo habri y sincero entre varios cultura, por conduci na paz duradero.
INDICADORNAN TEMATICO DEN AGENDA 2030
Na ocasion di e Foro di Ministernan di Cultura cu a tuma luga dia 19 di november 2019 na Oficina Principal di UNESCO na Paris, Francia, e Sector di Cultura orguyosamente a introduci e Indicadornan pa e asina yama Culture|2030 Indicators.
E Indicadornan Tematico di UNESCO pa Cultura den e Agenda 2030 (Culture|2030 Indicators) ta un cuadro di indicadornan tematico, cu tin como meta pa midi y monitorea e progreso y contribucion di cultura den implementacion di e Sustainable Development Goals, tanto na nivel nacional como na nivel local den e Agenda 2030 pa Desaroyo Sostenible.
https://whc.unesco.org/en/culture2030indicators/
E cuadro aki ta duna acceso na tur dos e rolnan di cultura:
- e rol di cultura como un sector di actividad;
- e contribucion transversal di cultura entre e diferent SDGs y area di maneho.
CONFERENCIA MONDIACULT 2022
E Conferencia Mundial di UNESCO riba Maneho di Cultura y Desaroyo Sostenibel – MONDIACULT 2022, UNESCO a organisa cuarenta aña despues di e prome Conferencia Mundial Mondiacult riba Maneho di Cultural organisa na Ciudad di Mexico (Mexico) na 1982. Esaki a tuma luga 24 aña despues di e Conferencia Mundial riba Maneho di Cultura pa Desaroyo organisa na Stockholm (Swisa) na 1998. UNESCO-MONDIACULT 2022 su Conferencia Mundial a tuma luga for di 28 te cu 30 di september 2022, organisa pa Gobierno di Mexico.
https://www.unesco.org/en/mondiacult2022
MONDIACULT 2022, e conferencia mundial mas grandi dedica na cultura den e ultimo 40 añanan, a trece hunto 2,600 participante durante un periodo di 3 dia na Ciudad di Mexico. Riba invitacon di UNESCO y Gobierno di Mexico, 150 Estado a manda delegacion pa participa na e conferencia.
135 di nan tabata representante na e nivelnan mas halto di un pais of den persona di e Minister di Cultura.
https://www.unesco.org/en/articles/mondiacult-2022-states-adopt-historic-declaration-culture
Declaracion Final di MONDIACULT 2022
Na e UNESCO World Conference on Cultural Policies and Sustainable Development – MONDIACULT 2022, e Ministernan di Cultura di e Paisnan Miembro a aproba e Declaracion Final. E documento ta actualmente obtenibel solamente den idioma Ingles.
https://www.unesco.org/en/articles/mondiacult-2022-states-adopt-historic-declaration-culture
E Declaracion ta integra e prioridadnan comun y ta delinea un agenda prospectivo, cu ta probecha plenamente di e impacto transformado di cultura pa e desaroyo sostenibel: reafirma e compromiso di e paisnan miembro, pa aborda e desafionan contemporaneo urgente y compleho di nos sociedadnan multicultural. Tambe a reconoce cultura como un bien publico global cu un balor intrinsico.
Den liña cu esaki tambe ta destaca e necesidad di inclui un obhetivo cultural den e Agenda pa Desaroyo Sostenibel post-2030 (Art.20), y ta urgi UNESCO pa lansa e Foro Mundial riba Maneho di Cultura cada cuater aña (Art. 21).
Definicion di Cultura
MondiaCult 2022 ta reafirma e definicion di cultura di e siguiente forma:
“Cultura ta e conhunto distinctivo spiritual y material, intelectual y emocional cu ta caracterisa un sociedad of un grupo social. E ta abarca banda di arte y literatura, e manera di biba, derechonan fundamental di e ser humano, e sistemanan di balor, e tradicionnan y e creencianan.”
CULTURA DEN AGENDA 2030
Metanan di e Agenda pa Desaroyo Sostenibel, pa por alcansa un desaroyo sostenibel (SDGs).
Agenda pa Desaroyo Sostenibel:
ta un plan universal di accionnan pa transforma e mundo pa 2030. Paisnan miembro di Nacionnan Uni (UN) unanimamente a acepta Agenda 2030 na september 2015. SDGs ta un set di aspiracionnan pa comparti, pa trece cambio na nivel global, nacional y local. Hunto nan ta integra y balansa e tres pilarnan di desaroyo sostenibel esta – e pilar economico, social y ambiental.
Cultura, incluyendo herencia tangibel y intangibel, tambe industria cultural y industria creativo ta un sector cu su mesun derechonan, mientras cu cultura ta contribui transversalment na e desaroyo sostenibel entre e tres pilarnan. Cultura ta un medio cu por uza y e ta alabes un meta pa por logra desaroyo sostenibel. UNESCO, como e unico agencia di Nacionnan Uni cu un mandato riba tereno di cultura, a propone formanan di reconoce, aprovecha y mehora e papel importante di cultura den e implementacion di Agenda 2030.
Den cuadro di e Tratado di UNESCO pa Proteccion di Patrimonio Cultural Intangibel (PCI) of Herencia Cultura Intangibel (HCI), riba e website aki por haya tur informacion bou di e menu na e opcion di Patrimonio Cultural Intangibel.
Riba nivel internacional por bay tambe riba e website di UNESCO pa mas informacion na
https://ich.unesco.org
TRATADO PA PROTECCION DI HERENCIA CULTURAL SUB-ACUATICO (UNESCO – 2001)
Tratado pa Proteccon di Patrimonio Cultural Sub-acuatico
Pa reconoce patrimonio cultural sub-acuatico ta basta dificil. E Tratado di 2001 ta propone un marco comun huridico cu tur pais miembro di UNESCO por uza pa identifica, investiga y proteha miho su patrimonio sub-acuatico. Cu esaki por garantisa tambe su preservacion y sostenibilidad. Dia 2 di november di 2001, na e di 31 Conferencia General di UNESCO, a aproba e Tratado pa Salvaguardia Patrimonio Cultural Sub-acuatico, pa urgi e paisnan miembro pa tuma tur e medidanan apropia pa proteha patrimonio sub-acuatico (https://en.unesco.org/underwater-heritage/2001)
Pa contenido di e Tratado por bishita:
https://www.unesco.org/en/legal-affairs/convention-protection-underwater-cultural-heritage
Definicion di Patrimonio Cultural Sub-acuatico
Patrimonio cultural sub-acuatico ta encera tur rastro di e ser humano su existencia cultural, historico of arkeologico cu, durante por lo menos 100 aña, tabata parcialmente of totalmente, periodicamente of permanentemente, bou di e superficie di lama, den lago of riu.
https://en.unesco.org/underwater-heritage/2001
Programa di Patrimonio Cultural Sub-acuatico di UNESCO
UNESCO ta duna guia na tur pais miembro den e proceso di ratificacion di e Tratado di 2001. Tambe den su implementacion nacional, como den cooperacion internacional pa mehora e proteccion di patrimonio cultural sub-acuatico rond mundo. Pa por encurasha standard etico di nivel halto, e Secretariado di e Seccion pa e Tratado di 2001 ta organisa tayer di capacitacion cu funcionarionan di patrimonio cultural sub-acuatico den e regionnan di mundo riba e Tratado, y riba e proteccion di patrimonio sub-acuatico. Tambe ta yuda e paisnan miembro activamente pa harmonisa nan leynan. Ta pone tur instrumento disponibel. Tur recurso disponibel ta poni na disposicion di e paisnan miembro, pa apoya nan esfuersonan.
https://en.unesco.org/underwater-heritage/actions-of-protection
Patrimonio Cultural Sub-acuatico den Reino Hulandes
Reino Hulandes ta prepara pa ratifica e Tratado pa Proteccion di Patrimonio Cultural Sub-acuatico (UNESCO 2001). Relaciona cu su implementacion tin dos grupo di trabou den cada pais di Reino Hulandes cu nan representante.
Un grupo di trabou ta atende asuntonan legislativo cu cada pais mester regla pa implementa e Tratado. Aruba su representantenan akiden ta di Museo Arqueologico Nacional di Aruba (MANA) y di Departamento di Cultura Aruba (DCA). E otro grupo di trabou ta atende e trayecto pa conscientisa comunidad di cada pais di e contenido y significacion di e Tratado. Den e grupo di trabou aki Aruba su representante ta MANA.
EDUCACION DI CULTURA Y ARTE
Cultura y Educacion ta e wes’i lomba pa desaroyo duradero.
Hunto nan ta forma e hende cu nos ta awe y kende nos lo ta mañan.
Programa Educacion di Cultura y Arte di UNESCO
E programa Culture and Arts Education (CAE), UNESCO a desaroya pa cumpli cu su mandato interdisciplinario riba tereno di e materia di cultura y educacion, como parti di un vision renoba den educacion, basa riba respet pa diversidad cultural y respet pa e derechonan humano.
Trahando na e crusada di cultura y educacion, UNESCO ta mobilisa su experto- y recursonan pa apoya su paisnan miembro pa duna sosten na un cantidad grandi di interesado den e desaroyo di maneho y accion transversal. Di patrimonio cultural te cu industria cultural y di creatividad, UNESCO ta haci tur esfuerso pa integra un cantidad grandi di contexto educativo. Un acercamento pa ekipa studiantenan di tur edad cu miho conocemento, habilidad y actitud necesario pa desaroya nan potencial. Asina nan por enfrenta desafio den futuro y crea un educacion mas husto y un futuro pacifico pa tur hende. (https://www.unesco.org/en/culture-education.)
Definicion di Educacion di Cultura y Arte
Educacion di Cultura y Arte ta e sinergia entre e dos sectornan, reconociendo e necesidad di un educacion relevante na e contexto, cual ta encera patrimonio cultural, historia y e conocementonan tradicional. E intencion di Educacion di Cultura y Arte ta pa amplia e resultadonan di siña, mehora educacion di calidad y amplia e aprecio pa diversidad cultural, multilingualismo, educacion artistico y alfabetisacion digital.
Educacion di Cultura y Arte ta reconoce e importancia pa mehora e sinergia entre cultura y educacion pa fomenta e integracion sistematico di cultura den educacion formal, no- formal y informal. Tambe den educacion y formacion tecnico, educacion profesional (EFTP) y pa inverti den sector cultural, pa sostene e tarea educativo y social di museo- y institucionnan cultural. (Final Declaration Mondiacult-2022/CPD/6, page 4).
Cuadro pa Educacion di Cultura y Arte (Culture and Arts Education Framework)
Den cuadro di e Programa di CAE, desde 2021 UNESCO a cuminsa cu un revision di e Cuadro pa Educacion di Cultura y Arte ( https://www.unesco.org/en/frameworkcultureartseducation)
E proceso di revision aki ta un oportunidad clave pa reforsa e acuerdo global riba nivel di cultura y educacion, y promove plan di maneho y di accion integral, pa desaroyo inclusivo y holistico di e ser humano y e sociedad.
Relaciona cu esaki, UNESCO lo organisa un Conferencia Mundial riba Educacion di Cultura y Arte, cual lo tuma luga na comienso di 2024 na Union di Emirato Arabe. (https://www.unesco.org/en/news-world-conference-culture-education)
Cuadro pa Educacion di Cultura y Arte den Reino Hulandes
Na nivel di Reino Hulandes tin un Grupo di Trabou-CAE, cu ta traha conforme e programa di Educacion di Cultura y Arte di UNESCO, pa un colaboracion y cooperacion entre tur e teritorionan di Reino Hulandes. Tambe a yega na un palabracion, cu e seis islanan hunto cu Hulanda lo bay traha riba implementacion di un Cuadro pa Educacion di Cultura y Arte den Reino basa riba e Culture and Arts Education Framework di UNESCO. Tur e representantenan di e teritorionan den Reino den e Grupo di Trabou-CAE a bay di acuerdo pa uza e definicion di UNESCO pa educacion di cultura y arte. E colaboracion aki ta basa riba e Declaracion di MONDIACULT, the UNESCO World Conference on Cultural Policies and Sustainable Development, cu a tuma luga na Mexico na september 2022.
Comision Nacional di Educacion di Cultura y Arte
Tambe ta e intencion pa nombra un Comision Nacional di Educacion di Cultura y Arte na cada isla, cu tin como tarea primordial pa traha un inventario di loke ta tumando luga riba tereno di Cultura y Arte den Educacion formal, no-formal y informal.
Descripcion di Educacion formal, no-formal y informal
Educacion formal
Segun Concepto INE, Instituto Nacional de Estadística (CINE-2011 na Spaña):
educacion formal ta educacion institucionalisa, intencionalmente y planifica pa departamento- publico y organisacionnan priva acredita pa e organonan, hunto cu otro identidadnan, ta constitui e sistema educativo formal huridico di un pais. https://www.ine.es › DEFIne › concepto
Educacion formal ta un proceso di enseñansa-aprendisahe sistematico, cu e meta pa certifica cu un persona a logra cierto conocemento pa medio di lesnan cu el a ricibi. E parti formali di proceso ta radica den e echo cu mester cumpli cu e -orarionan stipula, programa di estudio, forma gruponan di studiante, cifranan pa studiante (cu ta cuminsa for di kleuterschool te cu universidad), cu ta tuma luga denter di un institucion, cu ta apunta esun responsabel pa implementa e proceso.
Revista Innovaciones Educativas On-line version ISSN 2215-4132
Innovaciones Educativas vol.25 n.38 San José Jan./Jun. 2023
http://dx.doi.org/10.22458/ie.v25i38.4535
Educacion no-formal
Forma di educacion no formal ta: tayer, conferencia, charla of curso di capacitacion, cu ta realisa pa satisface e necesidadnan specifico di diferente grupo, pa tanto persona adulto mayor como menor di edad, cu of sin estudio formal. Nan ta actividadnan educativo bon organisa y sistematico. Por duna e educacion aki tanto paden of pafo di un centro educativo formal. E meta final di lesnan aki ta pa cumpli cu obhetivonan concreto di educacion.
https://revistas.uned.ac.cr/index.php/innovaciones/article/view/4535/6315
Educacion informal
Educacion informal ta un proceso di aprendisahe continuo cu ta tuma luga bida largo,
caminda experiencia diario ta acumula pa personanan di diferente indole y di edad diverso, sin importa espacio unda esaki ta tuma luga. Caracteristica di educacion informal ta cu e no tin regla,-orario of obhetivo. Ta trata di acontecimientonan cu ta tuma luga den relacionnan diario, cu ta presenta na un momento determina y cu tin como consecuencia cu e persona cu ta biba e momento aki ta siña di loke el a caba di experiencia.
https://liceoeuropa.com
PROGRAMA MUSEO di UNESCO
UNESCO ta apoya paisnan den desaroyo cu ta uza e potencial di museonan pa fomenta cohesion social, particularmente entre e comunidadnan local y e gruponan desafortuna. Na paisnan unda tin conflicto, manera ta e caso na Egipto, Afganistan, Irak y Mali, ta menasa e museonan cu sakeoen busca di obhetonan valioso of simbolonan di identidad nacional. UNESCO ta interveni pa proteha y rehabilita e museonan. UNESCO tambe ta desaroya capacidad pa specialistanan di museo pa conserva coleccionnan y pa traha inventario y documentacion. Esaki ta pa contribui na e lucha contra traficacion ilicito di obhetonan cultural. (https://www.unesco.org/en/museums)
Museonan ta hunga un rol di liderazgo den e impulso di un economia creativo na nivel local y regional. Museonan tambe ta cada bes mas presente den e esfera social. Nan ta actua como plataforma pa debate y discusion. Nan ta atende cu cuestionnan social compleho y stimula participacion di publico.
ICOM ta un asociacion cu miembro y ta un organisacion no-gubernamental cu ta stipula normanan profesional y etico pa actividad di museo. Como foro di experto, e ta haci recomendacionnan riba cuestionnan relaciona cu patrimonio cultural. E ta promove desaroyo di capacidad y fomenta conocemento. ICOM ta e bos di profesionalnan di museo den practica internacional y e ta aumenta consciencia cultural di publico a traves di rednan global y programa di cooperacion.
https://icom.museum/en/about-us/missions-and-objectives/
Mision di ICOM
ICOM ta un organisacion internacional di museo y profesionalnan di museo cu ta compromete su mes cu investigacion, conservacion, continuacion y comunicacion na e comunidad di patrimonio natural y cultural di mundo, presente y futuro, tangibel y intangibel.
https://icom.museum/en/about-us/missions-and-objectives/
Definicion di Museo
Un museo ta un institucion permanente, sin fin di lucro, na servicio di e comunidad. E ta investiga, colecciona, conserva, interpreta y exhibi patrimonio tangibel y intangibel. Un museo ta habri pa publico, e ta accesibel y inclusivo. Museonan ta stimula diversidad y sostenibilidad. Nan ta traha y ta comunica di manera etico, profesional y cu participacion di comunidad. Nan ta ofrece varios experiencia riba nivel di educacion, diberticion, reflexion y intercambio di conocemento.
https://icom.museum/en/resources/standards-guidelines/museum-definition/
Na Praga, Republica Checa, dia 24 de agosto 2022, Asamblea General Extraordinario di ICOM a aproba e proposicion pa e definicion nobo pa museo cu 92,41% (na fabor: 487, contra: 23 y abstencion: 17).
Museums Association of the Caribbean (MAC)
MAC a keda funda na 1987, cu e meta cu museo-, organisacion- y sociedadnan den Caribe por comparti experiencia y habilidad. Di e manera aki a reconoce e importancia di museonan como centro di conservacion y preservacion di patrimonio natural y cultural y di nos patrimonio comun, y tambe e rol vital di museonan den maneho di sistemanan educativo, investigacion cientifico y di turismo den e paisnan di Caribe https://caribbeanmuseums.com/
MAC ta traha pa fortalece e vinculo entre e museonan di Caribe, nan personal y nan colaboradonan, pa hunto fomenta y promove aprecio y comprension di e patrimonio cu nan tin en comun. Esaki ta tuma luga pa medio di educacion y desaroyo di norma di practicanan profesional. E asociacion ta sirbi como foro pa intercambio di informacion di idea pa medio di reunion, publicacion y intercambio entre museonan.
Obhetivonan di MAC
E obhetivonan principal di MAC ta:
- desaroyo di politica (maneho) comun relaciona cu e rol di museonan y e tareanan di e personal curatorial;
- duna conseho na gobierno y institucionnan riba nivel di desaroyo di museonan;
- desaroya relacion cu organisacionnan internacional y otro organisacionnan regional cu tin un relacion cu museo;
- apoya e politica/maneho y programanan cultural di e Comite Cultural Regional di CARICOM (Comunidadnan di Caribe).
https://icom.museum/en/committee/museums-association-of-the-caribbean/
Inventario di Museonan na Aruba
Comision Nacional pa UNESCO di Aruba (UNESCO-Aruba) a compila e documento “Nos Herencia Cultural di Noord te San Nicolas”, pa haya un miho bista di tur e museo- y centronan di exposicion cu tin na Aruba te cu december 2022. E documento aki ta un inventario di diferente museo y centro di exposicion of un espacio unda tin un coleccion di artefacto cu un balor museal, cultural y/of historico. Den e inventario ta inclui e organisacion- of coleccionistanan cu a participa, sea como un museo of cu un sala of sitio di exposicion. E descripcionnan den e documento ta basa riba e informacion cu Melisa Bermudez, un studiante di Saxion University of Applied Sciences, Hospitality Business School na Hulanda, a compila pa medio di un investigacion durante su stage pa su estudio di Tourism Management. El a haci su stage bou guia di sra. Ruby Eckmeyer, specialista pa cultura na e secretariado di UNESCO-Aruba. Pa contenido di e inventario aki por bishita http://www.coleccionaruba.aw/
Dia Internacional di Museo
Cada aña desde 1977, ICOM ta organisa Dia Internacional di Museo, cu ta representa un momento unico pa e comunidad di museo riba nivel internacional.
E meta di Dia Internacional di Museo (DIM) ta pa crea consciencia riba e echo cu museonan ta:
- un instrumento importante pa stimula intercambio cultural,
- aporta na enrikecemento di cultura y
- aporta na desaroyo di comprension mutuo, di cooperacion y di paz entre pueblonan.
Riba 18 di mei cada aña, relaciona cu fecha aki, tin varios evento y actividad ta tuma luga pa celebra- Dia Internacional di Museo. E iniciativanan aki por dura un dia, un fin di siman of henter un siman. https://icom.museum/en/international-museum-day/
Dianan Internacional di Cultura cu ta promove na Aruba ta:
- 21 di febr Dia Internacional di Idioma Materno
- 21 di maart Dia Internacional di Poema
- 27 di maart Dia Mundial di Teatro
- 15 di april Dia Internacional di Arte
- 18 di april Dia Internacional di Monumento y Sitio (Dia di Patrimonio Mundial)
- 29 di april Dia Internacional di Baile
- 30 di april Dia Internacional di Jazz
- 18 di mei Dia Internacional di Museo
- 21 di mei Dia Mundial pa Diversidad Cultural pa Dialogo y Desaroyo
- Siman Internacional di Cultura – End of May International Arts Education Week https://www.unesco.org/en/weeks/arts-education