Inventario​​

Responsabilidad di cada pais
Cada pais ta tuma e medidanan necesario pa garantisa proteccion di patrimonio cultural intangibel presente den su teritorio. Entre e medidanan di proteccion, e pais ta identifica y defini e diferente elementonan di patrimonio cultural intangibel presente den su teritorio, cu participacion di comunidad, e grupo- y organisacionnan no gubernamental relevante (NGO’s).

Participacion di comunidad, grupo y individuo
Den cuadro di e actividadnan pa salvaguardia patrimonio cultural intangibel, cada pais ta haci empeño pa logra participacion mas amplio posibel di comunidad, e gruponan concerni, y si ta apropia, di e individuonan cu a crea, ta mantene y traspasa e patrimonio y, pa envolve nan activamente den su maneho.

Pa sigura identificacion, cu e meta pa salvaguardia un elemento cultural intangibel, cada pais, di acuerdo cu su propio situacion, ta stipula uno of mas inventario di e patrimonio cultural intangibel presente den su teritorio. Mester actualisa e lista di inventario(nan) regularmente.

Medida pa salvaguardia Patrimonio Cultural Intangibel (PCI)
Pa sigura proteccion, desaroyo y promocion di patrimonio cultural intangibel presente den su teritorio, cada pais mester haci tur loke ta na su alcance pa:

• Adopta un maneho general dirigi, pa duna realce na e funcion di patrimonio cultural intangibel den e sociedad, y pa integra su proteccion di patrimonio den programanan di planificacion;
• Designa of funda uno of mas instancia competente, pa salvaguardia e patrimonio cultural intangibel presente den su teritorio;
• Fomenta estudio cientifico, tecnico y artistico, como tambe metodologia di investigacion, pa salvaguardia patrimonio na un forma eficaz, particularmente patrimonio cultural intangibel cu ta na peliger;
• Adopta medida di orden huridico, tecnico, administrativo y financiero adecua pa:
  • Institui, funda of fortalece institucionnan pa formacion riba tereno di maneho di patrimonio cultural intangibel, y e trapaso di tal patrimonio, den foro y localidadnan destina pa nan presentacion, manifestacion y expresion;
  • Garantisa acceso na e patrimonio cultural intangibel, respetando na mes momento custumber, tradicion y creencia cu ta rigi e accesibilidad na e aspectonan determina di e patrimonio concerni;
  • Establece institucionnan di documentacion tocante patrimonio cultural intangibel y facilita acceso na e centronan aki.