Dande ta un tradicion di fin di aña na Aruba, unda antes un grupo di musico ta compaña un cantado di Dande, bishitando famianan riba dia di Aña Nobo.
Dande ta nomber di e cantica, e musica y e grupo. E cantica di Dande ta un forma di hiba bendicion di aña nobo pa henter un famia, cantando un dedicatorio especial pa cada miembro di un famia.
Dande ta un tradicion cu ta traspasa di generacion pa generacion. Pa motibo cu Dande ta un tradicion den region Caribe cu ta conoci solamente na Aruba, e Arubianonan ta considera e celebracion folclorico aki como un di e expresionnan di patrimonio cultural cu mas ta representa nan identidad.

E instrumentonan cu ta uza pa e cancion di Dande ta: tambor, wiri y instrumento di cuerda. E instrumentonan principal ta violin, acordeon of otro instrumento di cuerda.
E cantado di Dande ta crea su propio letranan durante cu e ta canta un persona, deseando e persona tur cos bon pa e proximo aña.
Cada frase ta cuminsa cu "Oh Dande,...", y e coro ta responde cu e palabranan "Ay Nobe". E cantantenan ta kere den e poder di Dios pa nan por desea bendicion pa cada persona cu nan canta.
E cantante ta tene un sombre den su man, mientras cu e ta canta. Esun cu ta ricibi e cancion di Dande, e receptor, ta pone placa den e sombre, como gradecimento pa e bendicion cu el a haya. Antes e hendenan tabata duna un pida bolo na luga di placa.

E portado- y practicantenan di Dande ta e cantante, e grupo di musico y e famianan cu ta ricibi e Dande. Na principio di e celebracion aki na Aruba, e grupo tabata consisti solamente di hende homber y no tabata permiti mucha pa forma parti di un grupo di Dande. Awendia hende homber, hende muhe y mucha ta forma parti di un grupo di Dande. Principalmente e comunidad catolico local ta celebra e tradicion aki.

E conocemento ta keda traspasa di generacion pa generacion den famianan cu ta practica e musica y tradicion di Dande. E portadonan tambe ta esnan cu ta ricibi e gruponan, aprecia e tradicion Dande y promove e balor di e celebracion aki. E creencia fuerte ta, cu si un persona no ricibi un grupo di Dande, su aña lo no ta bon den e aña nobo.
E musica di Dande ta trece alegria, bendicion y un mensahe special. Hopi Arubiano ta hiba e cancion di Dande, como parti di su identidad y un sentimento nostalgico di pertenencia, ora nan ta bay habri un aña nobo na cualkier parti di mundo. E componente di bendicion ta ancra den e sistema di creencia di e Arubiano.

E festivalnan di Dande di awendia ta contribui hopi den e desaroyo di e tradicion di Dande. Na radio y na television ta promove e tradicion aki den comunidad.