Museonan ta importante pa educacion y desaroyo general di un pueblo. Na e conferencia general di UNESCO na november 2015 a aproba e Recommendations concerning the Protection and Promotion of Museums and Collections, their Diversity and their Role in Society (mira Anexo I). Den e introduccion di e recomendacionnan, Unesco ta stipula pa cada pais miembro di UNESCO tuma e medidanan legal necesario of di otro orden pa pone den practica, principio- y normanan conforme e recomendacionnan.

Comision Nacional pa UNESCO di Aruba (UNESCO-Aruba) a compila e documento “Nos Herencia Cultural di Noord te San Nicolas”, pa haya un miho bista di tur e museo- y centronan di exposicion cu tin na Aruba te cu december 2022. Tambe ta importante pa haya un bista di e contexto cu museonan ta funciona aden, pa por formula conseho y eventualmente un Plan di Accion basa riba evidencia y informacion cu ta valido.

E documento aki ta un inventario di diferente museo y centro di exposicion of un espacio unda tin un colleccion di artefacto cu un balor museal, cultural y/of historico. Den e inventario aki ta inclui e organisacion- of coleccionistanan cu a participa, sea como un museo of cu un sala of sitio di exposicion. E descripcionnan den e  ocumento aki ta basa riba e informacion cu Melisa Bermudez, un studiante di Saxion University of Applied Sciences, Hospitality Business School na Hulanda, a compila pa medio di un investigacion durante su stage pa su estudio di Tourism Management. El a haci su stage bou guia di sra. Ruby Eckmeyer, specialista pa cultura na e secretariado di UNESCO-Aruba.

Den e inventarisacion cu a tuma luga for di september te cu januari 2022 a inclui, re-colecta y analisa algun informacion, incluyendo algun dato cu a colecta desde 2018. Sra. Eckmeyer, como consehero pa Maneho di Cultura di Minister di Finansa, Asuntonan Economio y Cultura, a cuminsa traha riba un inventarisacion na aña 2018. Na 2021 sra. Angeline Vrolijk-Maduro, beleidsmedewerker na Departamento di Cultura Aruba, a actualisa e datonan. Na 2022, Melissa Bermudez, un studiante di Saxion University, pa medio di contacto directo via yamada of e-mail cu cada museo y centro di exposicion, a actualisa y expande e informacion y datonan pa e inventario aki. Alabes el a bishita Museo Arqueologico y Museo Cas Tan Tin den forma di orientacion. Cada instancia tabatin un persona di contacto principal cu a fungi den caso cu mester informacion specifico of adicional di e museo/organisacion, coleccion of exposicion.

Den e inventario cu a tuma luga a haya entre otro informacion tocante: e coleccion di cada museo of centro di exposicion, nan orario, prijs pa entrada, cantidad di empleado y di e situacion relaciona cu bishitante cu ta bini di afo y promocion turistico di e museo of centro di exposicion. A base di e informacionnan cu a ricibi y despues di a analisa e datonan, ta duna algun conseho cu ta relevante pa Ministerio di Cultura, Departamento di Cultura y UNESCO-Aruba, cu por uza pa traha hunto cu e
museo- y centronan di exposicion riba un plan di accion.

E personanan cu a contribui na e inventarisacion ta nombra den e colofon na final di e documento aki. UNESCO-Aruba ta gradici tur persona cu di un of otro forma a haci posibel pa por a finalisa e trabou di documentacion y inventarisacion na final di 2022 y a duna nan contibuicion den 2023 pa publica e relato final na juli 2023. Un danki special ta bay na Melissa Bermudez, kende a mustra su determinacion pa den un tempo cortico, di september pa december 2022 (re-)colecta tur e datonan pa e por a analisa nan y yega na un relato preliminario na januari 2023 di suma importancia riba desaroyo museal na Aruba. Palabra di gradicimento ta bay tambe na sra. Lidia de Cuba, docente di Papiamento, cu a haci e revision di ortografia.

Marushka Tromp
Secretaria General
UNESCO Aruba

Download PDF: Inventarisacion 2023-08-08 Museonan di Aruba FINAL