UNESCO-Aruba ta felicita Melissa Bermudez, kende a haci su stage na nos secretariado na fin di 2022, cu su graduacion na juli 2023 na Saxion Hogeschool na Hulanda den e ramo di Tourism Management.

Durante su stage, Melissa a inventarisa e museo, coleccion y centronan di exposicion cu tin na Aruba, bou guia di sra. Ruby Eckmeyer, specialista di cultura na UNESCO-Aruba. Banda di e tarea cu museonan tin riba tereno educativo, di entertainment y social, nan ta un producto turistico-cultural di suma importancia. UNESCO ta recomenda tur pais miembro pa promove y proteha museonan cu ta contribui na formacion y concientisacion di nan bishitantenan y futuro generacion. 

Melissa tabata un studiante hopi motiva y proactivo, kende tabata bay e ‘extra miles’, manera yuda cu diferente actividad, curso, presentacion y te hasta fungi como maestro di ceremonia pa un encuentro di Region Latino America y Caribe pa e programa Memoria di Mundo. Aki el a demostra e poder di nos habilidad multilingual na Aruba.  

Masha masha pabien Melissa y hopi exito mas den bo carera profesional.