Desde 15 di november 1955 Gobierno di Aruba a aproba escudo di Aruba, cu ta simbolisa diferente aspecto tipico di e pueblo di Aruba. Escudo di Aruba ta consisti di cuater parti.

E prome parti na man robes ariba ta refleha e mata di aloe, cu ta simbolisa e prome fuente di ingreso, cu tabata e industria di aloe.

E di dos parti ariba na man drechi ta refleha Hooiberg, cu ta simbolisa e isla cu a sali for di lama. E color berde ta representa e alegria cu ta sinti, desde cu Aruba a haya su auto-determinacion y e liñanan ta simbolisa e olanan di lama.

E di tres parti abou na man robes ta refleha dunamento di man, cu ta simbolisa e lasonan di amistad entre e pueblo di Aruba y otro nacion riba tereno politico, economico y cultural. E color cora ta representa e caracter generoso, e simplesa y balor di e pueblo di Aruba, pa reforsa e lasonan aki.

E di cuater parti abou na man drechi ta refleha un wiel, cu ta simbolisa un timon, cu ta duna guia na e industria, cu ta e fuente di bida di mas importante pa Aruba.

E cruz meymey di e cuater partinan di e escudo ta simbolo di debocion y fe.
E Leon cora na e parti mas ariba di e escudo ta simbolisa forsa y generosidad.
E ramanan na e parti mas abou di e escudo ta simbolo di paz y amistad.