Kico ta UNESCO?

UNESCO ta un organisacion cu ta yuda fomenta paz mundial door di enfoca riba enseñansa, ciencia, cultura, comunicacion y informacion. E tin 193 pais miembro y tambe 11 pais cu ta asocia.

Pa motibo cu guera ta nace den mente di hende muhe y hende homber, ta den mente di hende muhe y hende homber mester planta e defensanan pa paz.
UNESCO ta e organisacion di Nacionnan Uni pa Educacion, Ciencia, Cultura, Comunicacion y Informacion. E ta contribui na paz mundial, promoviendo cooperacion internacional riba tereno di educacion, ciencia, cultura, comunicacion y informacion. E programanan di UNESCO ta contribui na e logro di e Obhetivonan pa Desaroyo Sostenibel (ODS), cu ta stipula den Agenda 2030, adopta pa e Asamblea General di Nacionnan Uni di 2015.

UNESCO ta e unico Agencia di Nacionnan Uni cu un network global di institutonan nacional conoci como UNESCO Comision Nacional. E Comisionnan Nacional ta parti di e structura constitucional general di e Organisacion, manera cu e fundadornan a planea. Actualmente, e Comisionnan Nacional ta funciona den tur Pais Miembro di UNESCO. Nan ta consisti realmente di un famia global, cu ta inclui un network extenso di colaborador- (stakeholders), partner-, y expertonan. Nan tin un bentaha comparativo pa e Organisacion, dentro di e sistema di Nacionnan Uni.

E Organisacion tin 193 Miembro y 11 Miembro Asocia. Un teritorio of grupo di teritorio, cu no ta responsabel pa e conducta di nan relacionnan internacional, por haya admision como Miembro Asocia. Aruba ta un Miembro Asocia di UNESCO, desde 20 di october 1987, pa medio di un solicitud cu Hulanda a haci na nomber di Aruba.
Pa mas informacion di UNESCO, por bishita e portal di e website:
na Spaño https://www.unesco.org/es
na Ingles https://www.unesco.org/en

Educacion
Educacion ta transforma bida, y ta e enfoke principal den e mision di UNESCO, pa construi paz, eradica pobresa y stimula desaroyo sostenibel. E ta un derecho humano di tur hende pa bida largo. UNESCO ta e unico organisacion di Nacionnan Uni cu un mandato, pa inclui tur e aspectonan di educacion.

UNESCO a haya e encargo pa guia e Agenda Mundial di Educacion 2030, a traves di e Obhetivo di Desaroyo Sostenibel # 4.

UNESCO ta eherce un liderazgo mundial y regional den educacion, ta fortalece e sistemanan educativo na nivel mundial, y ta reaccion riba e desafionan mundial contemporaneo, a traves di educacion cu igualdad di genero como punto di salida. Su trabou ta abarca desaroyo di educacion di calidad desde educacion preescolar te cu educacion superior y mas halto.

E topiconan di prioridad di UNESCO pa cu educacion ta entre otro:

  • Proteccion di e derecho di Educacion;
  • Igualdad di genero den educacion;
  • Educacion pa bida largo;
  • Reforsa y monitorea sistemanan di educacion;
  • Transformacion di educacion;
  • Educacion pa sostenibilidad;
  • Cooperacion internacional.

 

Na Aruba educacion ta ancra den ley sin discriminacion. Transformacion di educacion, educacion pa sostenibildad y cooperacion internacional tin prioridad pa UNESCO Aruba.

Ciencia
Creando conocemento y comprension a traves di ciencia ta capacita nos pa soluciona e desafionan economico, social y ambiental urgente di awendia, y logra desaroyo di sociedadnan sostenibel y mas berde.

Saliendo for di punto di bista cu ningun pais por alcansa desarayo sostenibel su so, cooperacion cientifico internacional lo contribui, no solamente na conocemento cientifico, pero tambe na construccion di paz.

Den e sociedadnan actual, cu ta cada bez mas diverso, UNESCO ta sigui cumpli tur dia cu su mision humanista fundamental, pa yuda tur hende enfrenta e desafionan contemporaneo, comprende otro miho, y traha hunto pa construi un paz duradero. UNESCO tambe ta yuda facilita pa tur persona crea y haci uzo di conocemento, pa logra sociedadnan husto, inclusivo, resiliente y democratico.

Cultura
For di e monumentonan historico y museonan importante, te cu practica di patrimonio bibo y forma di arte contemporaneo, cultura ta enrikece nos bida na tur manera y ta yuda construi comunidadnan inclusivo, innovativo y resiliente. Protegiendo y salvaguardiando patrimonio cultural y natural di mundo, apoyando creatividad y e sectornan cultural dinamico, ta fundamental pa confronta e retonan di nos tempo;for di cambio climatologico te cu pobresa, desigualdad, e division digital y e emergencia- y conflictonan cada bes mas complica. UNESCO ta convenci cu ningun desaroyo por ta sostenibel, sin un componente cultural fuerte. En realidad, ta solamente un desaroyo for di e punto di bista cu e ser humano ta central, basa riba respet mutuo, cu dialogo habri y sincero entre varios cultura, por conduci na paz duradero.

Comunicacion y Informacion
UNESCO ta defende y promove libertad di expresion, independencia y pluralismo di e medionan di comunicacion, construccion di sociedadnan cu conocemento inclusivo, basa y fortifica door di acceso universal na informacion, y e uzo di tecnologia digital innovativo.

Pa medio di capacitacion, asesoramento den maneho, cooperacion internacional, monitor y prevencion den ambito di libertad di expresion, acceso na informacion, y digitalisacion -esta integracion di tecnologia digital-,

UNESCO lo sigui empodera tur stakeholder principal, cu e obhetivo pa sigura y garantisa libertad fundamental, tanto online como offline, conforme cu e normanan internacional.

Esaki ta ainda mas relevante, pa sigura e desaroyo etico y e uzo di tecnologia emergente, cu tin un impacto creciente riba tur aspecto di sociednan na henter mundo.

E ciudadanonan tambe lo ta empodera pa disfruta di e tecnologia nobo, considera un libertad fundamental, pa medio di desaroyo di e competencianan di siglo 21, fomentando ambiente propicio pa pluralismo y diversidad di medionan di comunicacion.

Programa di Participacion
UNESCO tin un Programa di Participacion (PP) cada dos aña cu ta duna e posibilidad pa entrega un peticion pa asistencia financiero pa ehecuta un proyecto. E PP di UNESCO ta ofrece sosten financiero na proyectonan cu ta ser manda door di paisnan miembro y/o miembronan asocia y organisacionnan no-gubernamental (ONG) cu ta conecta directamente cu un di e areanan di UNESCO. E sosten financiero aki ta limita y su meta ta di funciona como ‘seed money’ (placa inicial), cual no ta ofrece sosten structural na organisacionnan. E suma maximo cu por worde ricibi ta:

  • USD. 26,000 pa un proyecto nacional;
  • USD. 28.000 pa un proyecto subregional of interregional;
  • USD. 38.000 pa un proyecto regional.

E Programa di Participacion ta fungi como un suplemento esencial na actividadnan regular di UNESCO.

Dianan Internacional di UNESCO
E dianan aki ta conmemoracion internacional cu UNESCO ta observa. Nacionnan Uni ta asigna dia, siman aña y decenia specifico, como ocasion pa conmemora eventonan of topico particular, cu e fin pa promove mediante conscientisacion y accion, e obhetivonan di e Organisacion. Normalmente, ta e Paisnan Miembro ta propone e conmemoracionnan aki, y e Conferencia General ta adopta nan cu un resolucion.

Cada dia internacional ta brinda instancianan y stakeholders envolvi, e oportunidad pa organisa actividad relaciona cu e tema di e dia ey. E organisacion- y oficinanan den e sistema di Nacionnan Uni, y principalmente, e gobiernonan, sociedad civil, sector publico y priva, e scol- y universidadnan, y mas en general, ta e ciudadanonan ta esnan cu ta haci di un dia internacional un trampolin pa stimula conscientisacion.

Pa mas informacion bishita:
https://www.unesco.org/es/days
https://www.unesco.org/en/days
https://www.un.org/en/observances/list-days-weeks