Articulo VII di e Constitucion di UNESCO ta stipula cu, ‘cada Pais Miembro ta cera acuerdonan segun ta cumbini nan situacion particular. E proposito ta pa asocia su institutonan principal, interesa den areanan di educacion, ciencia y cultura, pa e trabou di e Organisacion, preferiblemente pa medio di formacion di un Comision Nacional, cu representacion amplio di e gobierno y di dicho institutonan.’

Ademas e Constitucion ta afirma, cu e Comisionnan ‘ta actua den capacidad di consehero pa nan Gobiernonan den asuntonan relaciona cu e Organisacion’ y ‘ta funciona como agencianan di liaison den tur asunto cu ta di importancia pa e Comisionnan. Pues, e ta un obligacion constitucional di cada Pais Miembro, pa establece un Comision Nacional. 

E obhetivo principal mester ta participacion di varios ministerio, instancia, instituto, scol, universidad, NGO- y individuonan, na e trabou di e Organisacion. E Comisionnan Nacional, cu respectivamente cada gobierno ta establece, mester fungi como ‘espacionan di encuentro’ y ‘puentenan di conexion’ entre e autoridadnan nacional, cu un diversidad amplio di instancia y expertonan di UNESCO su areanan di competencia. Aunke realisacion di e obhetivonan di UNESCO ta encomenda primordialmente na e gobiernonan, e expectativa ta pa e Comisionnan Nacional funciona como un plataforma indispensabel unda interes, idea y cultura ta representa y interactua.